Mertxika, gazta eta intxaur entsalada

Errezeta fresko, arin eta oso udatiarra. Mertxikaren goxotasuna, gaztaren leuntasuna eta intxaurren ukitu kurruskaria primeran uztartzen dira.

Osagaiak

• 2 mertxika heldu baina sendo
• Hosto berdeen nahasketa
• 100 g gazta fresko, ahuntz-gazta edo mozzarella
• Intxaur eskukada bat
• Oliba-olio birjina estra
• Limoi erdiaren zukua edo sagar-ozpina
• Gatza eta piperbeltza
• Eztia, aukeran

Prestaketa

Mertxikak garbitu eta atal finetan moztu. Nahi izanez gero, zuritu daitezke, baina azalarekin ere oso ondo geratzen dira.

Jarri hosto berdeak plater edo erretilu batean, eta banatu mertxika zatiak gainetik.

Gehitu gazta dadotan edo xerratan, eta intxaur zatituak.

Ondu oliba-olioarekin, limoi-zukuarekin edo sagar-ozpinarekin, gatzarekin eta piperbeltzarekin.

Ukitu goxoagoa nahi baduzu, gehitu ezti hari fin bat.

Berehala zerbitzatu, fresko-fresko.

Mertxika eta tomate gazpatxoa

Osagaiak (2–3 pertsonarentzat)

• 3 tomate heldu
• 2 mertxika heldu
• ½ luzoker
• ¼ piper gorri
• ½ baratxuri ale
• 2 koilarakada oliba-olio birjina estra
• Koilarakada 1 sagar-ozpin
• Gatza eta piperbeltza
• Ur hotza, behar izanez gero

Prestaketa

Tomateak, mertxikak, luzokerra eta piperra garbitu.

Osagai guztiak zatitu eta mertxikei hezurra kendu.

Jarri dena irabiagailuaren ontzian, baratxuriarekin, oliba-olioarekin, ozpinarekin, gatzarekin eta piperbeltzarekin batera.

Ondo irabiatu testura fin eta homogeneoa lortu arte.

Lodiegia geratzen bada, gehitu ur hotz pixka bat nahi duzun testura lortu arte.

Gorde hozkailuan gutxienez ordubetez eta zerbitzatu oso fresko.

Mertxika plantxan jogurt eta eztiarekin

Postre erraz, goxo eta oso udatiarra. Plantxan eginda, mertxika mamitsuagoa eta aromatikoagoa geratzen da, eta jogurtarekin eta eztiarekin oso ondo uztartzen da.

Osagaiak (2–3 pertsonarentzat)

• 2–3 mertxika heldu baina sendo
• Jogurt naturala edo greziarra
• Eztia
• Intxaur edo almendra eskukada bat
• Oliba-olio birjina estra
• Menda freskoa
• Kanela, aukeran

Prestaketa

Mertxikak garbitu, ataletan edo erditik moztu, eta hezurra kendu.

Plantxa edo zartagin bat berotu oliba-olio tanta batzuekin.

Mertxikak 2–3 minutuz egin alde bakoitzetik, urre-kolorea hartu eta pixka bat karamelizatu arte.

Jarri jogurta plateraren oinarrian eta banatu gainetik mertxika epelak.

Gehitu ezti hari fin bat, fruitu lehor zatituak, menda hosto batzuk eta, nahi izanez gero, kanela pixka bat.

Berehala zerbitzatu, epel edo hotz.